Нийслэл дэх Төрийн аудитын газар ажлаа дүгнэж байна.


НТАГ энэ оны үйл ажиллагааныхаа дүнг гаргаж, тайлангийн хурлаараа хэлэлцлээ. Хуралд НТАГ-ын дарга бөгөөд тэргүүлэх аудитор С.Энхбаатар ажлын тайланг танилцуулав.

Тус газраас сүүлийн 3 жил нийслэл, дүүргийн төсвийн байгууллагууд болон орон нутгийн өмчийн газруудтай тодохой бодлого чиглэлийн дагуу үе шаттай цогц арга хэмжээ авч хэрэгжүүлсний үр дүнд төрийн аудитын ажлын үр  нөлөө бодитойгоор дээшилж иржээ.

НТАГ-аас НИТХ-ын хуралдаанд танилцуулсан зарим үр дүнгээс дурьдвал энэ 2019 онд гэхэд:

  • Хөрөнгө оруулалтын үр өгөөжийг дээшлүүлэх талаар НИТХ-ын удирдлага онцгой анхаарч, НТАГ-ын албан шаардлагын дагуу хөрөнгө оруулалтын жагсаалтын  асуудлыг НИТХ-ын ээлжит ХХҮП хуралдаанаараа хэлэлцэж, жагсаалтад өөрчлөлт оруулсан НИТХ-ын тэргүүлэгчдийн 9 тогтоолыг хүчингүй  болгож, эрх шилжүүлсэн шийдвэрээ цуцалсан. Энэ нь НИТХ-аас нийслэл, дүүргийн түвшинд санхүүгийн үйл ажиллагааг зохицуулах хууль тогтоомжийг мөрдөх чиглэлд хийж байгаа зөв зүйтэй, үр өгөөжид чиглэсэн арга хэмжээ болж байна.
  • Нийслэлийн ТЕЗ-ийн 2017, 2018 оны нэгтгэсэн тайланд хийсэн аудитын дүнгээр нийслэлийн ТЕЗ бөгөөд Нийслэлийн Засаг даргын захирамжаар 2018 онд 15 төсвийн захирагчид, үүнээс 5 дүүргийн Засаг дарга нарт хариуцлага тооцож, сахилгын арга хэмжээ авсан бол энэ онд 22 албан тушаалтанд хариуцлага тооцжээ. Ингэснээр нийслэлийн түвшинд санхүүгийн хариуцлагын тодорхой тогтолцоо төлөвшиж байгаа юм.
  • НТАГ нийслэлийн төсвийг бүрдүүлэхэд бодитой хувь нэмэр оруулж байна. Энэ онд хийсэн СТА-ын явцад гэхэд л 2.0 тэрбум төгрөгийг санхүүгийн эргэлтэд оруулж, 500 сая төгрөгийн актыг барагдуулж, газрын хуулийн хэрэгжилтэд хийсэн нийцлийн аудитын албан шаардлагаар зөвхөн 2017-2018 оны газрын дуудлага худалдааны үнэ төлөөгүй байсан 2.5 тэрбум төгрөгийг төлүүлжээ.

2019 оны ажлын үр дүнгээрээ санхүүгийн аудитын хэлтсийн аудитын менежер А.Цогбаяр, нийцлийн аудитын хэлтсийн ахлах аудитор Д.Ичин нар “НТАГ-ын шилдэг аудитор”-оор, санхүүгийн аудитын хэлтсийн аудитор Д.Нарантуяа, гүйцэтгэлийн аудитын хэлтсийн ахлах аудитор Б.Номинбаатар нар “Оны тэргүүний ажилтан”-аар тус тус шалгарч, санхүүгийн аудитын хэлтсийн аудитор Н.Баттогоо, Р.Түмэн-Эрдэнэ нар тэргүүлэх аудиторын шагналаар шагнагдлаа.